
第一世噶玛巴教言集1KM16བདེ་མཆོག་གི་ཞི་བའི་སྦྱིན་སྲེག་བཞུགས་སོ། །
1-2-156a
༄༅། །བདེ་མཆོག་གི་ཞི་བའི་སྦྱིན་སྲེག་བཞུགས་སོ། །
༄༅། །བདེ་མཆོག་གི་ཞི་བའི་སྦྱིན་སྲེག་བཞུགས་སོ། །གང་ཞིག་བསམ་པའི་དོན་རྣམས་འགྲུབ་མཛད་པ། །ཕྲིན་ལས་མཐར་ཕྱིན་དཔལ་ལྡན་ཞབས་ལ་འདུད། །བཅོམ་ལྡན་འདས་དཔལ་བདེ་མཆོག་གི་ཞི་བའི་སྦྱིན་སྲེག་བྱེད་པར་འདོད་པས། ནང་གི་མཆོད་པའི་རྗེས་ལ་མཎྜལ་དྲི་ཞིམ་པོས་བྱུགས་ལ། པདྨ་འདབ་མ་བཞི་པ་བྲི། དབུས་སུ་རྡོ་རྗེ་གིས་མཚན་པ་བྲི། དེ་ནས་བསྲེག་རྫས་ཡམ་ཤིང་བཟླུམ་པོར་བརྩིགས། མཆོད་པ་བཤམ། དཀར་གསུམ་མངར་གསུམ་ལ་སོགས་པའི་བསྲེག་རྫས་རྣམས་ཚོགས་པར་བྱ། གཏོར་མ་བཤམས། སེམས་བསྐྱེད་བྱས་ལ། དེ་ནས་དཀོན་མཆོག་སྤྱི་མཆོད་འབུལ། བདེ་མཆོག་བསྒོམ་བཟླས་བྱས་ལ་མེ་སྦར། མཎྜལ་དབུས་ཀྱི་རྡོ་རྗེ་ཧཱུྃ་གིས་མཚན་པ་ལས་འོད་ཟེར་འཕྲོས་པས། སེམས་ཅན་ཐམས་ཅད་ལ་ཕོག །སྡིག་སྒྲིབ་སྦྱངས་ནས་ཐམས་ཅད་བདེ་མཆོག་ཏུ་གྱུར། ཚུར་འདུས་རྡོ་རྗེ་ཧཱུྃ་གིས་མཚན་པ་ལ་ཐིམ༑ དེ་ཡོངས་སུ་གྱུར་པ་ལས་བདེ་མཆོག་ཏུ་གྱུར་པར་བསམ། དེའི་ཐུགས་ཀར་པཾ་ལས་པདྨ། རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཡེ་ཤེས་ཀྱི་བདེ་མཆོག་སྤྱན་དྲངས་ལ་བཞུགས་པར་བསམ། དེ་ལ་མཆོད་བསྟོད་བྱ། བསྲེག་རྫས་ཉི་ཤུ་རྩ་གཅིག་དབུལ། དེ་ནས་དམ་ཚིག་པ་དང་ཡེ་ཤེས་པ་དབྱེར་མེད་པར་གྱུར་པར་བསམ་ལ། མཆོད་བསྟོད་བྱ། བསྲེག་རྫས་བརྒྱ་རྩ་བརྒྱད་དབུལ། དེ་ནས་ཆུ་ལས་ཉ་འཕར་
1-2-156b
བའི་ཚུལ་དུ་དམ་ཚིག་པའི་ཐུགས་ཀར་ཡེ་ཤེས་སེམས་དཔའ་བསམ་ལ། མཆོད་བསྟོད་བྱ། བསྲེག་རྫས་བདུན་དབུལ། དེ་ནི་གཏང་རག་གི་མཆོད་པའོ། །དེ་ནས་གཏོར་མ་དབུལ། བསྟོད་པ་བྱ། འདོད་པའི་དོན་ལ་གསོལ་བ་བཏབ། བཤགས་པ་བྱ། སྨོན་ལམ་བཏབ། ཡི་གེ་བརྒྱ་པ་བརྗོད། དགེ་རྩ་བསྔོ། ཡེ་ཤེས་པ་གཤེགས། དམ་ཚིག་པ་རང་ལ་བསྡུའོ། །རང་གི་སྡིག་པ་སྦྱོང་ན། ཨོཾ་ཧྲི་ཧ་ཧ་ཧཱུྃ་ཧཱུྃ་ཕཊ། བདག་གི་སྡིག་པ་སརྦ་པཱ་པཾ་ད་ཧ་ན་ཤཱ་ན་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་པར་བྱའོ། །གཞན་གྱི་དོན་དུ་བྱེད་ན། གང་བྱེད་པ་དེའི་ནད་དང་གནོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་བརྗོད་དོ། །ཞི་བའི་སྦྱིན་བསྲེག་བྱས་པ་ཡིས། །ནད་དང་གནོད་པ་ཐམས་ཅད་ལས་ཐར་བ་དང་། །སྡིག་པ་ཐམས་ཅད་དག་པ་དང་། །བསམས་པའི་དོན་རྣམས་འགྲུབ་པར་ངེས། །བླ་མ་ནཱ་རོ་པའི་བདེ་མཆོག་ལྷ་ལྔའི་ཞི་བའི་སྦྱིན་སྲེག་རྫོགས་སོ།། །།


目录
བདེ་མཆོག་གི་ཞི་བའི་སྦྱིན་སྲེག་བཞུགས་སོ། །